Долго очекуваниот меч за светски шампион во тешка категорија меѓу Британецот Тајсон Фјури и Украинецот Владимир Кличко ќе се одржи на 29 октомври во Манчестер.
Како што пренесуваат британските медиуми, а повикувајќи се на објавата на Питер Фјури, тренер и вујко на актуелниот шампион Тајсон Фјури, кој на својот „твитер“ профил напиша: „Конечно сме тука, наскоро очекувајте објава за мечот Фјури – Кличко. Имаше многу политички глупости, но се е завршено, Манчестер Арената е резервирана за 29 октомври. Боксерите се спремни, адвокатите и промотерите исто“.
Римечот беше одложуван во неколку наврати, а последниот кој требаше да се одржи на 9 јули се одложи поради повреда на Фјури.
Британецот Фјури минатиот ноември му го нанесе првиот пораз на Владимир Кличко по 11 години по што ги освои шампионските појаси во четирите верзии (WBA, WBO, IBO и IBF) но оваа последната му беше одземена на Фјури бидејќи се реши на меч со Кличко наместо да боксува против првиот (задолжителен) предизвикувач Вјачеслав Глазков.