Вооружените сили на Владата на национално единство на Либија денеска презедоа офанзива против позициите на Исламска држава во градот Сирт.
– Силите навлегоа во последните два кварта на Сирт, кои останаа под контрола на ИД. Почна последната битка за Сирт – изјави Реда Иса, портпарол на владините сили.
Околу 1.000 војници учествуваат во последната фаза на операцијата. Џихадистите се обиделе да ги нападнат владините сили со автомобил-бомба, но биле спречени од тенк.
Според очевидци, неколку тенкови и други воени возила се придвижуваат кон северниот кварт на Сирт, кој е под контрола на ИД,
Сирт е на 450 километри источно од Триполи. Сирт е најголемиот град во Либија кој е под контрола на ИД. Градот беше заземен минатата година. Либиските владини сили на 12 мај почнаа операција за ослободување, а во градот влегоа на 9 јуни.