Речиси половина од последните лекари кои работат во населбите на Алепо под контрола на бунтовниците, испратија писмо до Белата куќа во кое ја опишуваат очајната ситуација на населението, доколку режимот преземе нова опсада.
Изминатиот викенд бунтовниците успеаја да ја пробијат тримесечната блокада, која предизвика огромно поскапување на производите кои им се најнеопходни на населението. Според лекарите, ситуацијата останува безнадежна.
– Ако нема постојано отворен пат за снабдување повторно ќе бидеме блокирани од режимските сили, сиромаштијата ќе се зголеми, а медицинските резерви сосема ќе се потрошат, предупредуваат здравствените работници.
Потпишаните 15 од вкупно 35 лекари се разочарани од односот на САД, кои „не преземаат никакви мерки за да се отстрани блокадата или да го искористат своето влијание за заштита на цивилите“.
– Ние немаме корист од солзи, ниту од симпатии, ниту од молитви. Само докажете дека сте пријатели на Сиријците, се наведува во писмото на лекарите.