Институтот по математика и физика од 30 мај до 7 јуни на Факултетот за електротехника и информациски технологии (ФЕИТ) ќе организира подготовителен курс по математика за сите матуранти.
Може да се пријават сите матуранти кои сакаат да го повторат материјалот по математика предвиден во програмата за матура и да им бидат објаснети задачите кои се полагаат на матурските испити.
Курсот ќе опфати 21 школски час (по три часа дневно), според распоред кој ќе биде објавен дополнително. Цената на курсот е 2000 денари.
Средношколците кои сакаат да го посетуваат курсот може да се пријават во просториите на ФЕИТ. Повеќе информации се објавени на линкот:
http://feit.ukim.edu.mk/fakultet/kursievi/podghotvitielien-kurs-po-matiematika-za-maturanti
– Со овој курс сакаме да ги подготвиме учениците со солидна оценка да ги положат испитите по математика, без разлика дали полагаат училишна или државна матура, изјави доцент д-р Сања Атанасова од Институтот по математика и физика.
Таа појаснува дека има различни истражувања за знаењата на учениците, кои не рангираат различно, согласно со одредени критериуми.
– Релевнатните податоци од овие меѓународни тестирања се дека нашите основци и средношколци, во нивните знаења, се зад своите врсници од регионот и пошироко. Општ впечаток е дека математиката не е доволно негувана наставна дисциплина и потребно е децата од мала возраст да се запознаат со нејзините убавини. Тоа, се разбира, вклучува поголем фонд и подобра организација на часовите по математика, смета Атанасова.