Претседателот на ВМРО-ДПМНЕ Никола Груевски денеска оствари средба со германскиот специјален претставник Јоханес Хајндл.
Како што соопштија од партијата, “соговорниците разговарале за актуелните теми и позиции поврзани со создадената криза од страна на опозицијата и идните чекори за нејзиното надминување“.
На средбата биле разгледувани различните аспекти на кризата, како и различните можности кои би довеле до нејзино разрешување.
Во однос на актуелната политичка криза претседателот на ВМРО-ДПМНЕ Никола Груевски истакнал дека партијата е посветена кон изнаоѓање решенија кои би значеле брз излез од наметната политичка криза.
Тој посочил дека ставот на ВМРО-ДПМНЕ е граѓаните да имаат можност да избираат помеѓу политичките субјекти и квалитативно да ги вреднуваат нивните политики и чекори.
– При носењето на одлуките ВМРО-ДПМНЕ се води од начелата содржани во Уставот, Законите и волјата на граѓаните притоа штитејќи го интересот на државата и затоа е потребно изнаоѓање на решенија со кој брзо ќе се надмине кризата и ќе се врати државата на патеките на напредокот и економскиот развој, истакнал Груевски.
Тој посочил дека за тоа е потребна функционална влада со полн легитимитет за реализација на ветените проекти од програмата и враќањето на сигурноста кај граѓаните при што ќе се помогне и во реализација на реформите кои произлегуваат како обврска од извештајот на Прибе важни за реализација на евроинтеграциските процеси, соопштија од ВМРО-ДПМНЕ.