Археолози од Швајцарија, Русија, Украина, Франција, Германија, Холандија, Грција, Литванија, Словенија и Македонија ќе учествуваат на Меѓународниот научен собир за археологија на мочуришта или водоземна археологија што од денеска до 17 мај ќе се одржува во Скопје и во Охрид, во организација на Центарот за истражување на предисторијата.
– Ова е прв настан и единствен од ваков тип во Македонија. Главна цел на научниот собир е да презентира методи на истражување во архелогија на мочуришта или водоземна археологија, изјави Гоце Наумов од Центарот за истражување на предисторијата.
Според него, една од целите е да се презентира она што го имаме како културно наследство и да видиме што имаат другите во т.н. водоземна археологија која има многу нови придобивки, а не ни се познати.
Собирот ќе се одржува во неколку институции, Музејот на Македонија, Музејот на Град Скопје, Археолошкиот музеј на Македонија, во Завод и музеј-Битола и во Охрид, каде ќе има многу предавања и презентации.
Научниот собир е во рамки на проектот NEENAWA (Network in Eastern European Neolithic and Wetland Archelogy), поддржан од Швајцарскиот национален фонд за наука.