Еврокомесарот за финансиски прашања Пјер Московиси синоќа се закани со воведување санкции кон Панама и останати земји познати како „даночни оази“, доколку не соработуваат со ЕУ во борбата против затајувањето даноци и перењето пари.
Осврнувајќи се на скандалот „Панамски документи“, Московиси нагласи дека се шокирачки податоците за количеството на пари, надлежностите и имињата поврзани со оваа афера.
– На луѓето им е преку глава од ваквиот безобразлук, изјави Московиси, додавајќи дека државите кои овозможуваат постоење сомнителни банкарски сметки, преку кои се избегнува плаѓање данок, каква што е и Панама, треба да сносат одговорност поради тоа.
Тој посочи дека Панама е на листата на држави кои одбиваат соработка со ЕУ за прашања поврзани со затајувањето на даноците, додавајќи дека земјата треба да ја преиспита ваквата своја позиција.
– ЕУ треба да биде подготвена да воведе санкции кон оние, кои ќе одбијат да го порменат своето однесување, нагласи Московиси.