Во Домот на културата „Антон Панов“ во Струмица денеска се одржаа традиционалните тримерски обичаи. Посната трпеза ја збогатија традиционалниот бел грав, сармите, посниот чурек (погача дел од обичаите во струмичкиот регион), овошјето, алвата, а членовите на ансамблот Тримери испеаја песни со еротска содржина.
Всушност празникот Тримери е тесно врзан со струмичкиот карневал. Во минатото, вечерта пред Тримери, вереникот заедно со пријателите и роднините ставале маски и оделе во домот на вереницата (армасаната девојка).
– Нашиот карневал се базира на шеговитиот еротски принцип, народот иако во тримерски денови ( tris – meres со значење тридневен пост ) кога армасаните девојки го започнувале својот пост, кој трае се до Велигден, обично се собирале по повеќе девојќи да постат во куќата на армасаната девојка, каде биле посетувани од жени кои носеле посни јадења и боза. Затоа и не случајно во Вторник навечер започнувало маскирањето и посетата на луѓето од куќа до куќа. Таквата посета се одвивала под маска бидејќи било строго забренета комуникацијата со девојките кои тримеруват, а проследен со еротскиот елемент поради будењето и пролетта и новото раѓање на се што е во природата, објаснува Јасмина Мазгалиева, дипломиран фолклорист-етнолог.
Со вечерашниот концерт на тримерски песни кој ќе почне во 19 часот во Домот на културата, завршуваат овогодинешните карневалски свечености.