Безбедноста на интернет, особено за младите лица со попреченост, и значењето на дигиталните вештини за поттикнување на вработливоста, ќе бидат во фокусот на овогодишните активности во Македонија за одбележување на европската кампања „Недела на дигитално вклучување“ (Get online Week), што се спроведува од денеска до 20-ти овој месец.
Здружението „Отворете ги прозорците“, национален координатор на кампањата, најави одржување работилница за безбедност на интернет во соработка со Дирекцијата за заштита на личните податоци, која ќе вклучи млади лица со и без попреченост.
Централен настан во одбележување на кампањата ќе биде конференцијата на тема „ИКТ и вработување: потреба и можности“ која има цел да придонесе за јакнење на свеста за потребата и можните придобивки од користењето на ИКТ како олеснителна вештина за еднакви можности на сите на отворениот пазар на труд.
Од Здружението „Отворете ги прозорците“ ги повикуваат граѓаните да се вклучат во активностите. Идејата е да се поттикнат што поголем број граѓани да дадат поддршка за промоција на можностите што ги нуди интернетот и технологијата.
Секој граѓанин на Македонија ќе може да ја даде својата поддршка преку пополнување на анкетниот прашалник, што ќе биде поставен на веб-страницата на Отворете ги прозорците www.openthewindows.org.
Кампањата „Недела на дигитално вклучување“ се реализира еднаш годишно во повеќе од дваесет земји во Европа и има цел да ги поттикне луѓето да ги користат придобивките од информациско-комуникациската технологија и интернетот.