Претседателот на ВМРО-ДПМНЕ, Никола Груевски, оствари средба со државниот секретар на германското МНР, Михаел Рот, при што пренел дека заложба на партијата е надминување на политичката криза, преку одржување на предвремени парламентарни избори согласно одредбите и роковите на изборниот законик кој го поддржаа парламентарните партии во Собранието на Република Македонија.
Претседателот Груевски истакна дека постои доволно време кое треба да се искористи од надлежните институции за сите неопходни процедури кои што ќе го гарантираат изборниот процес.
Груевски во тој поглед истакна дека приоритет на ВМРО-ДПМНЕ се организирање на фер, демократски и слободни избори на кои што граѓаните ќе се одлучат за иднината на државата и дека изборите се единствен излез од наметнатата политичка криза. Тој истакна дека што се однесува до ВМРО-ДПМНЕ ја дава максималната поддршка во поглед на спроведување квалитетен, фер и демократски изборен процес.
Соговорниците се осврнаа и на темата на евроатланските интеграции при што Претседателот на ВМРО-ДПМНЕ Никола Груевски, истакна дека членството во ЕУ и НАТО претставува стратешка цел, за што се преземаат мерките од реформскиот план и во таа насока е добредојдена поддршката на Германија и на останатите земји членки на ЕУ и НАТО, се вели со соопштението на ВМРО-ДПМНЕ.