Британецот Енди Мареј успеа да се пласира во финалето на Австралија Опен откако во полуфиналниот меч во пет сета го победи Милош Раониќ со 3:2 во сетови. Во недела во финалето што е реприза на ланското ќе игра против Новак Ѓоковиќ, кој вчера го совлада Рожер Федерер.
Мечот почна со водство на Раониќ, кој го доби првиот сет со 6:4 во гемови. Во вториот сет Мареј успеа да изедначи добивајќи го сетот со 7:5 во гемови. Третиот сет во тај брек со 7:6 (7-4 на поени) го доби Раониќ, а Мареј изедначи откако го доби следниот сет со 6:4 во гемови. Во решавачкиот беше 6:2 за Мареј, а Раониќ по повеќе од четири часа го загуби мечот, а во последниот сет имаше и проблеми со повредата на препоната.
За Мареј ова ќе биде петто учество во финалето во Мелбурн, а претходните четири меча ги загуби.
Утре во женското финале ќе играат Серена Вилијамс и Анжелика Кербер.