Снежната покривка во Струшко е околу 20 сантиметри, улиците се чисти, а сообраќајот се одвива нормално, информира претседателот на општинскиот штаб за кризи Абдула Ќазимоски.
Според него, општина Струга е подготвена да се справи и со поголеми врнежи од снег.
– Општината ги зголеми средствата за чистење на патиштата. Обезбедени се седум милиони денари, а доколку има потреба буџетот ќе биде зголемен, за разлика од минатата година кога имавме само четири милиони. Имаме добра соработка и со сите јавни претпријатија во општината, изјави Ќазимоски.
Претседателот на општинскиот кризен штаб информира дека се одвоени и средства за чистење на селските канали, кои се потенцијална причина за поплави.
