Во салата „Вилсир“ во Беверли Хилс денеска ќе биде прикажан филмот „Трето полувреме“ на режисерот Дарко Митревски, во рамки на Американскиот филмски маркет и т.н. Проекции за Оскар.
„Трето полувреме“ на режисерот Дарко Митревски е меѓу десет кандидати за номинација за Оскар за филм од неанглиско говорно подрачје кои ќе имаат специјални проекции во Лос Анџелес, од 1-ви до 7 ноември во рамки на Американскиот филмски маркет.
– Целта на прикажувањето е да им се даде максимален публицитет на филмските наслови и да се создаде простор за американска дистрибуција на филмовите.
„Трето полувреме“ во трката за Оскар ќе се прикажува пред дистрибутерите и меѓународните купувачи, но и пред членовите на Американската филмска академија, информира Филмскиот фонд на Македонија.
Претставувањето на филмовите го организираат European Film Promotion и Програмата Media на Европската унија.
Годинава се пријавени рекорден број – 71 филм за номинација за Оскар за филм од неанглиско говорно подрачје. Од нив ќе бидат избрани пет филма за официјални номинации.
Тие ќе бидат објавени на 10 јануари, а церемонијата на доделување на оскарите ќе се одржи на 24 февруари.