Велосипедистите од инцијативата Критична маса Тетово на Точак денеска својата 27. обиколка на градските улици ја почнаа и завршија со Дедо Мраз.
Трета година Дедо Мраз на велосипед ги посети децата од Центарот за едукација и рехабилитација на деца со потешкотии во развојот – „Виножито за сите” за да ја прошири предновогодишната радост и со децата со тешкотии во развојот.
– Ирвасите ми се изгубија во овој зачаден воздух и бидејќи не сакам да ги заморувам дополнително дојдов со велосипед. Со цел Тетово да стане почисто и да се намали загадувањето велосипедот е најдоброто превозно средство во какви било временски услови, изјави Игор Ристоски кој беше маскиран како Дедо Мраз на велосипед.
Велосипедистите од Критична маса Тетово на точак очекуваат тетовци идната година да ја поддржат нивната инцијатива – велосипедот да стане поприсутен на градските улици што ќе придонесе за намалување на загадувањето.