Американскиот кошаркар Дорон Лемб го засили тимот на Будуќност од Подгорица, потврдено е на интернет страницата на АБА лигата.
Тој на новите соиграчи ќе им се приклучи во петок, а договорот црногорскиот шампион е со важност до крајот на сезоната.
Лемб во Подгорица доаѓа од Развојната НБА лига. Минатата сезона настапуваше за Вестчестер постигнувајќи во просек 17,7 поени, 4,4 скокови и 2,4 асистенции.
Овој 24-годишен бек како студент на Универзитетот во Кентаки го освои НЦАА шампионатот во 2012 година, а во НБА лигата играше за Милвоки и Орландо.
Дебито на Лемб во Будуќност е најавено за вторник против Трабзон во Еврокупот.