Советничката група на ВМРО-ДПМНЕ смета дека Предлог-буџетот на Град Скопје за 2016 година е развоен, со голем број капитални проекти и инвестиции и оти ќе одговори на барањата и потребите на граѓаните на Скопје. Ова денеска го изјави Слободанка Алексовска, координатор на советничка група на ВМРО-ДПМНЕ во Град Скопје.
– За капитални расходи се предвидени 3.190.380.000 денари или 46,3 проценти од вкупниот предлог-буџет на Град Скопје за 2016 година. Во него се опфатени проекти во сите области кои се во надлежност на Град Скопје, рече Алексовска и додаде дека за реконструкција и изградба на улици и булевари, велосипедски патеки, водоводна, атмосферска и фекална мрежа се предвидени околу 2,5 милијарди денари.
Таа појасни дека буџетот е направен за граѓаните во целосно транспарентна постапка.
– Буџетот е правен во долга, транспарентна постапка и се вклучија сите политички партии застапени во Советот на Град Скопје, како и сите 10 општини преку давање предлози за проекти кои тие сметаат дека е неопходно да се реализираат. И граѓаните се вклучија во процесот на креирање на буџетот на Град Скопје, преку нивните најнепосредни претставници, претставниците од урбаните и месните заедници, потенцира Алексовска.
Во Предлог-буџетот на Град Скопје се предвидени проекти што ќе се реализираат во сите десет скопски општини. Во 2016 година ќе се реализира втората фаза од проектот за реконструкција и проширување на булеварот „Партизански одреди“ до кружниот тек кај црквата „Свети Петар и Павле“, ќе почне изградбата на новиот кружен тек на булеварот „8 Септември“, кај Хубо Маркет, ќе се реши проблемот со водоснабдување на жителите од Шуто Оризари…