Најдобрата македонска тенисерка Лина Ѓорческа е поразена во финалето на фјучрсот во Анталија. Таа денеска загуби од Русинката Алиса Клејбанова со 2-0, по сетови 6:3 и 6:4.
На тој начин беше прекината серија од 11 победи за Македонката во сингл конкуренција.
Во првиот сет се играше гем за гем до 3:3, а потоа Клејбанова ги освои следните три гема. Во вториот сет Ѓорческа водеше со 2:1, но следуваше пад во нејзината игра, што и овозможи на ривалката да стигне до трофејот.
За пласманот во финалето Ѓорческа ќе освои седум поени, додека за победата на фјучрсот од претходната недела ќе добие 12 поени и ќе има скок на ВТА листата.
Македонската тенисерка утре ќе го подобри пласманот на ВТА листата и во конкуренција на двојки по вчерашното прво место во Анталија со нејзината партнерка Ива Приморац од Хрватска.