Словенечкиот министер за надворешни работи Карл Ерјавец изјави денеска во интервју за виенски „Пресе“, дека бранот бегалци нема да запре во текот на зимата и најави дека неговата земја во иднина ќе ги враќа имигрантите, и оти нема да прифаќа бегалци кои евентуално во Словенија би ги протерувала Германија.
– Не се работи за никаква ограда, туку за техничка бариера, која треба да овозможи полесна контрола на бегалскиот бран, како и регистрација. Во минатото Хрватска целосно неконтролирано испраќаше групи бегалци во Словенија, појасни Ерјавец.
Тој изрази жалење што не било возможно од Хрватска, се до самитот ЕУ-Западен Балкан во Брисел, да се добиваат информации за бегалците.
Според него, Хрватска досега се придржува до договорот и соопштува кога групите бегалци доаѓаат на границата.
На констатацијата дека тогаш не се потребни бариери, Ерјавец рече дека бранот бегалци уште долго ќе потрае.