Со 97 гласа за и ниту еден против парламентот ги изгласа замениците министри во владата од кои тројца се на предлог на СДСМ, а еден на предлог на ВМРО-ДПМНЕ.
Кире Наумов од СДСМ е нов заменик министер во Министерството за финансии, Александар Кирацовски во Министерството за информатичко општество и јавна администрација, а Љупчо Николовски во Министерството за земјоделство. Овие заменици ќе имаат право на вето во своите ресори само за прашања поврзани со предвремените парламентарни избори следната година.
Со новата одлука на парламентот во Министерството за информатичко општество влегува Тимчо Муцунски, како редовен заменик министер на местото на Марта Арсовска-Томовска, која денеска беше назначена за нов министер.
Досегашниот министер за внатрешни работи, Митко Чавков, станува заменик министер, а истата рокада ќе се случи и во Министерството за труд и социјала каде што досегашниот министер Диме Спасов ќе биде под новоизбраната министерка Фросина Ременски.