Милитантната исламистичка група Абу Сајаф денеска објави видео порака во која за ослободување на тројца заложници, двајца од Канада и еден од Норвешка, бара откуп од по 21,3 милиони долари.
Во спротивно, групата, која како милитантноо крило на муслиманите од југот на Филипините и Малезија важи за огранок на Ал Каеда, ќе ги обезглави странците, кои беа киднапирани кон крајот на септември.
Во видео порака, еден од киднапираните, 68-годишниот Џон Ридсдел. драматично апелира канадскиот премиер да обезбеди пари за откупот. Ако не се плати откупот, вели тој, речиси е сигурно дека тројцата ќе бидат обезглавени.
Прпадниците на групата Абу Сајаф најчесто обезбедуваат финансиски средства со киднапирање на странци кои со јахти крстосуваат околу југот на филипинскиот архипелаг, како и богати бизнисмени од Филипините и Малезија.
Тие во политичката платформа нагласуваат дека се подготвени да прогласат калифати во делот на Филипините каде што муслиманите се доминатно население и во подрачјата на северна Малезија.
Филипинската армија, со поддршка на американското воздухопловство и морнарица од јули наваму е во постојана потера по борците на Абу Сајаф. Досега во престрелки и поставени заседи загинаа педесетина филипински војници, а загубите на исламските бунтовници не се познати.