Соочени со безидејноста и немањето поддршка за деструктивните политики, СДСМ повторно се користи со начинот кој единствено го знаат, а тоа е ширење невистини, изјави денеска на прес-конференција пратеникот Андон Чибишев од ВМРО-ДПМНЕ.
Чибишев реагираше на прес-конференцијата на портпаролот на СДСМ Петре Шилегов.
– ВМРО-ДПМНЕ по стоти пат ќе му одговори дека целокупниот имот, вклучително и зградата на новото седиште на ВМРО-ДПМНЕ е стекнат по легален пат, со целокупна документација и во транспарентна постапка согласно законските нормативи во Република Македонија, рече Чибишев.
Седиштето на ВМРО-ДПМНЕ, потенцираше тој, е изградено со јавно-приватно партнерство за кое беше распишан оглас.
– Целокупната изградба на овој објект беше на товар на инвеститорот кој имаше обврска да отстапи најмалку 30 отсто од вкупната бруто развиена површина. Овде нема ништо скандалозно или незаконски, колку и да сака Шилегов нешто да фабрикува, рече Чибишев.
Шилегов, како што кажа Чибишев, и денеска не одговори на прашањето кога ќе им биде вратено на граѓаните тоа што беше приграбено од СДСМ, а наследено од Сојузот на комунисти и беше создаван од парите на сите граѓани на Македонија, а вреди пет милиони евра.