Лидерот на италијанското популистичко Движење „Пет ѕвезди“, Бепе Грило е осуден на една година затвор поради клеветење на угледен научник и универзитетски професор.
Професорот Франческо Батаља тврди дека бил изложен на закани и навреди, како и дека тешко бил оштетен неговиот автомобил. Сето тоа се случувало откако Грило почнал јавно да го напаѓа, да му суди и да го критикува затоа што ја подржува нуклеарната енергија.
Малку е веројатно дека лидерот на „Пет ѕвезди“, која е втора по големина партија во Парламентот во Рим, ќе оди на издржување на затворската казна, но тој се соочува и со парична казна од 50 илјади евра, што сосема извесно ќе мора да ја плати.
Грило се смета себе си дека е налик на поранешниот италијански претседател и антифашиста Сандро Пертини и на првиот црнечки јужноафрикански претседател Нелсон Мандела.
– Ако тие големи личности биле во затвор за своите политички убедувања, ќе одам и јас, затоа што како мене (за нуклеарната енергија) мисли големо мнозинство од Италијанците, изјави Грило по соопштување на казната.
Батаља, професор на универзитетите во Модена и Реџо Емилија, бил речиси редовно изложен на клевети и напади од Грило на бројни митинзи што ги организирало неговото движење, уште од 2011 година.