Ролс Ројс официјално го претстави својот нов супер луксузен „Дoн“ кабриолет, што ќе дебитира на Саемот во Франкфурт идната недела.
Името на моделот Ролс-Ројс првпат го користи за „Силвер Дон“ (Сребрена Зора) од 1949 година. Тоа е првиот Ролс-Ројс со каросерија од нивната фабрика, а само 28 примероци од него биле во кабриолет изведба.
Новиот „Дон“ во продажба се очекува да се најде од идната година.
„Дон“, претставува кабриолет верзија на купето „Врајт“, кој пак е „Гоуст“ седан без задни врати. Сепак, благодарение на дискретните измени на каросеријата и ентериерот „Дон“ има сопствен карактер.
Ролс Ројс тврди дека бучавата во кабината со отворен покрив е иста како и во моделот „Врајт“ купе, а отворањето и затворањето на покривот трае 20 секунди при брзина до 48 километри на час.
Луксузниот кабриолет е придвижуван од твин-турбо 6,6 литарски В12 мотор од „Врајт“ со моќност од 563 коњски сили, што се пренесува со помош на осумстепен автоматски менувач.
Цените се уште не се официјално објавени, но се очекува дека почетниот модел ќе чини околу 290.000 евра.