Унгарската полиција употреби солзавец врз група од 200 мигранти кои се обиделе да напуштат прифатен центар за бегалци во местото Реске, во близина на границата со Србија.
Портпарол на полицијата изјави дека тие мигранти одбивале да дадат отисок од прсти и нагласи дека „полицијата се обидела да ја смири ситуацијата, но тие и понатаму протестираат“.
Полицијата соопшти дека ќе испрати 2.100 полицајци како засилување на границата со Србија, со цел да помогне за справување со зголемениот број имигранти.
Според полицијата засилувањето, што вклучува 2.106 полицајци опремени со хеликоптери, коњи и кучиња, ќе бидат распоредени на границата од 5 септември.
Унгарската Влада разгледува можност да ја употреби армијата за подобрување на безбедноста на јужната граница на државата каде илјадници имигранти се обидуваат да влезат од Србија на територијата на Европската унија.
Владиниот портпарол Золтан Ковач изјави дека прашањето за распоредување армиски единици на границата било расправано на седница на Кабинетот и советот за национална безбедност.
Одлука за тоа може да донесе парламентот кој идната седница почнува со работа по едномесечниот одмор.
Над две илјади лица влегоа во Унгарија преку границата со Србија во почетокот на неделата. Претходно властите беа принудени да почнат изградба на ѕид висок четири метри кон Србија за да запрат имиграциски бран.