Владејачката партија продолжува со истиот стил и понатаму се служи со лаги и манипулации и по секоја цена се обидува лично да ги дискредитира претставниците на СДСМ.
Сакаме да ги потсетиме Груевски и ВМРО-ДПМНЕ дека веќе седма година се на власт и ако имаше минимум вистина во нивните јалови обвинувања, одамна ќе имаше некаква постапка на државните институции, реагираа од СДСМ на денешната реакција на ВМРО-ДПМНЕ во која се вели дека Јани Макрадули сака да ја амнестира од одговорност својата кумашинка Радмила Шеќеринска.
„Напротив, тие и самите знаат дека се служат со лаги и затоа ги користат само за вребални препукувања. За Груевски и ВМРО-ДПМНЕ фактите се непобитни. Нивната Влада намерно не инвестираше во ниту еден капитален енергетски објект, за да може фамилијата да направи криминален увоз на скапа струја од речиси една милијарда евра.
– Бидејќи веќе со месеци јавноста е сведок како ВМРО-ДПМНЕ се обидува да подметне „кукавичко јајце“ дека наводно заради продажбата на ЕСМ денес поскапувала струјата, ние денеска му поставуваме две прашања:- Зошто Груевски се расфрлаше со 225 милиони евра кои ги начека во буџетската каса од продажбата на ЕСМ кога дојде на власт во 2006 година?
– И по истата нивна логика, дали заради потписот на Груевски на најкриминалната приватизација на рафинеријата „Окта“, денес поскапуваат нафтените деривати?
– Груевски и ВМРО-ДПМНЕ не можат да избегаат од сопствената одговорност дека заради нивните погрешни и криминални политики граѓаните денеска мораат да плаќаат многу поскапа струја од времето на владеењето на СДСМ. Впрочем, ако не ни веруваат нам, нека го прочитаат, според нив, „најпозитивниот“ извештај на ЕК за Македонија, во којшто има серија критики токму во делот на енергетиката“ – се вели во писменото соопштение од СДСМ.