По купе верзијата италијанскиот производител на супер брзи автомобили Ламборџини го претстави најмоќниот сериски Авантадор Роудстер.
Авантадор ЛП 750-4 СВ со отворен покрив беше премиерно претставен на манифестацијаат Пебл Биџ, што се одржува во август во Калифорнија.
Роудстер верзијата, исто како и купе изведбата е придвижуван од 6.5 литарски В12 мотор со 750 коњски сили. Авантадор СВ Роудстер е тежок 1.575 килограми, што е за 50 килограми повеќе од купе изведбата.
Дополнителната тежина се должи на потребата од дополнително зајакнување на конструкцијата на возилото. Роудстерот по потреба може да добие и покрив од јаглеродни влакна составен од два панели. Масата на двата елементи не надминува шест килограми, а кога не се користат може да се стават во багажниот простор.
Авантадор ЛП 750-4 СВ наспроти зголемената тежина од 0 до 100 километри на час забрзува за 2,90 секунди, што е за 0,1 секунда побавно од купе верзијата, додека максималната брзина изнесува 350 километри на час.
Ламборџини Авантадор СВ Роудстер во Европа ќе се продава по почетна цена од 357.000 евра, и ќе биде произведен во само 500 примероци.