Четириесет млади новинари од 17 европски земји ќе известуваат од Европското првенство во ракомет за младинки кое започнува денеска и ќе трае до 23 август.
На првенството, чиј домаќин е Македонија, ќе настапат 16 тимови, а натпреварите ќе се одржуваат во спортските сали „Јане Сандански“ и „Борис Трајковски“.
Младите новинари се дел од проектот „Ајде да играме ракомет – спортско известување и волонтерство“ организиран од Асоцијацијата за едукација Младиинфо Интернационал. Проектот опфаќа млади луѓе со различно искуство во новинарство и ракомет, кои ќе бидат во улога на новинари, фотографи и камермани, видео-уредници, уредници на веб-страницата на проектот и менаџери на социјалните мрежи, а ќе бидат координирани од двајца поискусни учесници – главни уредници.
Идејата на проектот е преку создавање различни медиумски производи од млади и наменети за млади луѓе, да се зголеми видливоста и интересот за женскиот ракомет и младинските првенства, како и да им се овозможи на младите новинари да стекнат практични знаења и искуства и да се запознаат со различни култури. Своите текстови, фотографии и видеа учесниците ќе ги објавуваат на веб-страницата на проектот http://www.letsplayhandball.eu како и на социјалните мрежи.
Пред почетокот на првенството, младите новинари учествуваа на тренинг за спортско новинарство, на кој своја сесија одржа и претставник на Европската ракометна федерација, а присуствуваа и на работилница за менаџмент на веб содржини.
Активностите од проектот кој дел од европската програма Еразмус Плус и претставува Европски волонтерски сервис од широки размери, а се одвива и во соработка со Македонската ракометна федерација, како и Европската ракометна федерација, ќе трае 40 дена.