„Додека граѓаните на Штип и околината се лекуват во мизерни, крајно недостоинствени услови, штипската клиничка болница повторно е дел од лажната пропаганда на ВМРО ДПМНЕ.
Без ниту минимум морална одговорност, за катастрофалната состојба во којашто се наоѓа болницата во Штип, без ниту малку срам, министерот Тодоров по кој знае кој пат најавува почеток на нејзина изградба.
Власта на ВМРО ДПМНЕ веќе девет години ги лаже штипјани“, рече на денешната прес конференција претседателот на општинската организација, Владимир Милошев.
„Прво, во 2006 година ВМРО-ДПМНЕ ветуваше реконструкција на болницата во Штип. Во 2008-ма година, повторно пред избори, по втор пат се најави нејзината реконструкција и штипјани повторно беа излажани.
Како што се влошуваше состојбата во штипската болница така се зголемуваа лагите. Пред сите избори ВМРО-ДПМНЕ најавуваше изградба на нова болница. Така беше и во 2011, и во 2013 и во 2014 година. Така е и сега.
Поминаа девет години, до ден денес ниту трага од бомбастичните најави.
Сите овие години пациентите од источниот регион се лекуваат во мизерни и крајно недостоинствени услови. Недостиг на основни средства, лекови, преполни болнички соби со 10, па и со 12 кревети, лоши хигиенски услови, простории полни со мувла и различни инсекти.
Министерот во заминување, Никола Тодоров, наместо да манипулара со јавноста во обид да ја избегне сопствената одговорност, должен е да одговори:
- Зошто во штипската болница подолг период недостасува основен оперативен материјал, хируршки конци и хируршки ракавици?
- Зошто во континуитет недостасуваат неопходите лекови во болничките шкафови, а пациентите се принудени сами да ги купуваат?
- Зошто во континуитет недостасуваат реагенси во болничката лабораторија?
- Зошто недостасуваат основните лекови за тешко бубрежно болните пациенти?
Додека штипјани се оставени без основни услови во штипската болница, власта во заминување троши стотици милиони евра за непродуктивни проекти, за споменици, фонтани, бронза и мермер.
Граѓаните повеќе не веруваат на лажните пропаганди и манипулации на Никола Тодоров и ВМРО-ДПМНЕ.
Господине Тодоров, поради вашите погрешни политики гаснат млади животи. Вие немате морален кредибилитет да зборувате за градење на нови болници. Само ваше заминување, заедно со целата влада на ВМРО-ДПМНЕ, го отвора патот за вистински здравствени политики и подобри состојби во здравството“, изјави Владимир Милошев.