Како последица од обилните врнежи во Тетовскиот регион по повлекувањето на водата останаа наноси од кал и делови откорнати дрва на локалните патни правци. Моментно, информира денеска Дирекцијата за заштита и спасување, се работи на расчистување на сообраќајниците за да се обезбеди непречено движење.
Патниот правец кон село Шипковица е пробиен и во тек се активности за негово проширување.
Механизација ангажирана од Дирекцијата работи на расчистување на локалниот патен правец помеѓу селата Селце и Вејце, Тетово – Јажинце, се работи на пробивање на магистралниот пат меѓу Порој, Џепчиште и Доброште, а се чисти и коритото на Поројска река. Во Тетово, во долниот крај на Диво Насеље, се расчистуваат подвозниците, ангажирана е една машина од ДЗС и механизација од ЈП Водовод и Канализација Скопје.
Преку Дирекцијата за заштита и спасување вкупно се ангажирани 15 багери и 29 камиони, а ќе бидат испорачани и 1.000 вреќи за песок.
