Новиот кошаркар на екипата од НБА лигата Сан Антонио, Бобан Марјановиќ нема да биде дел од репрезентацијата на Србија на претстојното Европско првенство што ќе се игра во Хрватска, Германија, Летонија и Франција.
Ова го објави Кошаркарскиот сојуз на Србија, откако новиот клуб Сан Антонио му забранил да настапува, бидејќи на местото на повреденото стопало има уште оток.
До проблем околу настапот на Марјановиќ „дојде“ откако помошниот тренер на Црвена Ѕвезда Велибор Радовиќ пред неколку дена изјави дека за време на финалето од шампионатот на Србија Марјановиќ играл со скршено стапало.
Марјановиќ изминатава сезона беше најдобар играч во редовите на Црвена Ѕвезда и беше прогласен за МВП (најкорисен играч) на лигашкиот дел од Евролигата. Европското првенство ќе се игра од 5 до 20 септември, а Србија е во групата Б (ќе се игра во Берлин) заедно со селекциите на: Германија, Шпанија, Италија, Исланд и Турција.