Премиерот на Косово, Хашим Тачи изјави дека тој и премиерот на Србија, Ивица Дачиќ на почетокот на средбата во Брисел се ракувале.
„Како што е вообичаено според европскиот протокол, ние се ракувавме. Тоа не беше прв пат претставници на Косово и Србија да се ракуваат. Тоа се случи во 1998-1999-та година, тоа се случи и денеска“, изјави Тачи за приштинската телевизија Kohavision.
На прашањето, како се чувствувал во текот на средбата, Тачи рече дека лидерите мораат да бидат над личните чувства и за нив во прв план треба да биде интересот на државата, во конкретниот случај интересот на Косово.
На изјавата на српскиот премиер, дека Косово колку му припаѓа на едниот, толку му припаѓа и на другиот, Тачи одговори – „бидејќи Дачиќ е роден во Призрен има право на двојно државјанство и со задоволство би му го овозможил“.
Косово им припаѓа на граѓаните на Косово, и ниту Србија, ниту Косово не се сопственост на Дачиќ или Тадиќ, туку припаѓаат на граѓаните, рече косовскиот премиер.