Со откинување на првите десертни сорти грозје „демиркаписка рана”, „јулски мускат” и „кардинал”, во Тиквешко како најголем лозарски регион во Македонија, започна бербата на трпезното грозје.
Килограм кардинал од првите количини од оваа година се продаваат по цена од 30 до 60 денари, зависно од квалитетот или зрелоста на грозјето.
- Апелирам до некои од лозарите предвреме да не берат кардинал и да чекаат родот убаво да созрее затоа што незрелото грозје на пазарот ја урива цената и на зрелото, нагласи денеска Ѓорѓи Ајтов, раководител во подрачната единица на Агенцијата за поттикнување на развојот во земјоделството во Неготино.
Ајтов истакна дека годинава квалитетот е извонреден поради добрите временски и климатски услови кои ги имаше во изминатиот период.
Се очекува деновиве да се отпочне и со откупот на десертно грозје во откупните пунктови.