Внатрешната истрага во „Македонски телеком“, која нејзината фирма-мајка „Маѓар телеком“ ја најави пред неколку месеци, во врска со наводите за вмешаност на комуникацискиот оператор во аферата „Прислушување“, е почната и се спроведува со поддршка на надворешни експерти, велат за „Мета“ од „Маѓар телеком“.
Во дописот, како одговор на прашањето дали е спроведена истрагата, од унгарската фирма, која е мнозински акционер во „Македонски телеком“, сепак не прецизираат кога надворешените експерти почнале со работа, до кога ќе трае истрагата и дали наодите од извештајот ќе ѝ бидат презентирани на јавноста.
– „Маѓар телеком“ ја почна внатрешната истрага со поддршка од надворешни експерти. Во согласност со нашата политика на усогласување, не сме во позиција да даваме повеќе коментари во врска со истрагата, стои во дописот од директоратот за корпоративни комуникации на „Маѓар телеком“.
Дека унгарскиот комуникациски оператор ќе спроведува истрага во македонската фирма-ќерка, беше најавено кон средината на март, откако опозицијата почна со објавувањето на прислушуваните материјали, односно т.н. „бомби“.
Првичната информација дека се планира истрага беше соопштена од „Дојче телеком“, фирма која е мнозински сопственик во унгарскиот оператор.