Германската канцеларка Ангела Меркел синоќа рече дека сите лидери на Европската унија силно аргументирале во корист на обврските кои се потребни за постигнување на договор меѓу Грција и нејзините доверители, јави дописникот на МИА од Атина.
На прес-конференцијата по самитот на лидерите од еврозоната во Брисел, Меркел истакна дека се уште треба многу напорно да се работи во преговорите и оти Грција мора да остане во еврозоната.
Таа рече дека времето за договор истекува, додавајќи дека преговорите со грчката Влада се однесуваат на одржливоста на грчкиот долг. Канцеларката, сепак, истакна дека Грција уште многу години нема да мора да почне да враќа голем дел од својот долг.
На посебна прес-конференција, шефот на ММФ Кристин Лагард изјави дека во следните 48 часа во Грција се уште треба да се заврши многу работа. Таа рече дека новите предлози на Грција се подетални, но не се целосно во согласност со она што беше дискутирано.
Истиот став го кажа и претседателот на Еврогрупата, Јерун Дијселблум, според кого потребна е „напорна работа“.