Германски војници ќе обучуваат припадници на јазидското малцинство да се борат против групата Исламска држава (ИД) во Ирак и Сирија, изјави германскиот министер за одбрана Урсула фон дер Лајен.
– Од денеска Бундесверот ќе обучува јазидски единици во кризните реони, со цел да се вратат територии преземени од ИД, истакна Лајен, потврдувајќи дека обуката е организирана во координација со курдските сили Пешмерга.
Џихадистичката група од минатата година презеде под своја контрола големи територии во северниот и западниот дел на Ирак, како и во источниот дел на Сирија.
Десетици илјади лица побегнаа од северниот дел на Ирак, откако борците на ИД ја презедоа областа Синџар, кој е населена главно со Јазиди.