Универзитетот „Св.Климент Охридски“ денеска го објави традиционалниот конкурс за најдобар истражувачки труд и есеј, на кој може да учествуваат студенти од прв циклус студии на овој универзитет.
Од Секторот за односи со јавност на битолскиот универзитет соопштуваат дека истражувачкиот труд е по слободен избор на студентот, но услов е трудот да не бил објавуван. Истата процедура се однесува и за натпреварот за избор на најдобар есеј, а конкурсот завршува на 31-ви октомври.
– Истражувачките трудови и есеи ќе ги оценуваат посебни комисии кои определуваат поблиски критериуми за вреднување на пристигнатите истражувачки трудови и есеи. Како и секоја година, најдобрите трудови ќе бидат парично наградени со 20.000 денари за прва, 15.000 денари за втора и 10.000 денари за трета награда и во двете конкуренции, рече Елизабета Атанасоска, советник за односи со јавност во Ректоратот на Универзитетот „Св.Климент Охридски“-Битола.
Традиционално, наградените студенти ќе бидат промовирани на 8-ми декември, Денот на патрониот празник на Универзитетот. Оваа година доделувањето ќе го изврши новоизбраниот ректор, професор д-р Сашо Коруновски.