Македонската академија на науките и уметностите денеска организира свечена академија за 200 години од раѓањето и 110 години од смртта на Јосип Јурај Штросмаер, хрватски културен деец, духовник и филантроп.
Бискупот ѓаковички, роден во Осиек во 1815 година, бил најпознат хрватски мецена, чие мото во животот било „Се за верата и татковината”.
Тој е значаен за хрватската култура, но и за македонската зашто со негова финансиска помош во 1861 година во Загреб бил отпечатен Зборникот на браќата Миладиновци.
На академијата на МАНУ се најавени обраќања на претседателот на Република Македонија Ѓорге Иванов, претседателот на МАНУ Владо Камбовски, ѓаковичко-осиечкиот надбискуп Ѓуро Храниќ, скопскиот бискуп и апостолски егзарх во Македонија Киро Стојанов и на академик Блаже Ристовски.
Ќе настапи и Женскиот камерен хор „Св. Злата Мегленска“ под диригентство на Летка Димовска-Полизова.