Фестивалот на уметничка фотографија „Малински Фото Фестивал“ денеска беше отворен во Куманово. Љубителите на уметничката фотографија имаат можност да разгледаат околу 300 фотографии изложени на неколку локации во градот, како Центарот за култура, Уметничка Галерија, тетарот, клупски простории, кафе барови…
– Фестивалот Малински првенствено е организиран и наменет за фотографите да разменат идеи, искуства. Имаме самостојни изложби, минијатури. Фестивалот овозможува да се видат најдобрите фотографии коишто минатата година добија први награди и беа избрани за најдобри во интернационални салони. Следуваат клупски фотографии, дури и аматерски фотографии од техничкото училиште. На изложбата „Тумба“ се најдобрите фотографии од фото клуб Куманово, на изложбата „Круг“ во „Трајко Прокопиев“ се најдобрите фотографии од Битола и Куманово, изјави Марина Крстиќ еден од организаторите.
Организаторите сметаат дека со фестивалот се афирмира уметничката фотографија.
– Успеавме да предизвикаме внимание едно поинакво доживување на фотографијата во Македонија. Фестивалот потполно беше прифатен од колегите, медиумите и на сите им е интересно што цел ден се дружиме и разгледуваме фотографии од цел свет. Од институциите не баравме покровителство, но следната година се надеваме дека ќе добиеме поддршка. Како и на клубот така и на градот му недостигаат ваков тип на манифестации, има многу фотографи од Куманово на кои им се потребни овие манифестации да ги изложат делата, изјави Дарио Королија исто така еден од организаторите на фестивалот.
На меѓуклупската изложба „Круг“ во НУКЦ „Трајко Прокопиев“ – Куманово, изложени се 51 од најдобрите фотографии на членовите од Фото клуб Куманово и Фото кино клуб Битола. Во „Касапски круг„ во кафе бар изложени се над 80 минијатури. Во холот на Центарот за култура изложени се фотографии на ученици. Клупската изложба ќе биде репрезентирана во Уметничката Галерија.
Самостојни изложби ќе имаат Зоран Ѓорѓевиќ фотограф од Србија и Предраг Поповски од Македонија.
Шест фото проекции ќе бидат прикажани во фоајето на Народен театар Куманово, каде ќе се претстават проекциите на Лили Марковиќ од Србија, Хулки Муради од Турција, Риланд Хоџа, Александар Наумчевски и Кирил Штрков од Македонија и Ахмед Абдулазим од Египет.
Фестивалот втора година по ред го организира Фото клубот од Куманово.