Заврши изградбата на потпорниот ѕид кај новиот кружен тек на влезот во Велес. Тој се наоѓа под Спомен-костурницата од НОВ и се простира во должина од 88 метри и со висина од четири метри.
Градоначалникот на Велес Славчо Чадиев денеска на прес-конференција соопшти дека ѕидот ќе ја зголеми безбедноста на патот и сообраќајот од одрони на земјиштето.
– За добро да ја обезбедиме стабилноста на ѕидот, градежната оператива при неговата изработка влезе длабоко под темелите на ѕидот и тој, според првичните пресметки, ја чини општинската каса повеќе од 25 илјади евра, рече Чадиев.
Тој информираше и дека во понеделник ќе се отвори тендерска постапка за избор на фирма која ќе го осветли кружниот тек со лед-светилки. Воедно ќе го осветли и патот кој води кон населбата кај Спомен-костурницата и долниот тек под кружниот тек, се до пругата, а кој води кон населбата Речани.
Чадиев најави дека целосното осветлувањето на кружниот тек со придружните сообраќајници треба да заврши за еден месец. Соопшти и дека се очекуваат уште две дозволи да започне и изградбата на уште еден кружен тек во новиот дел на Велес, кај „Авона“.