Израелскиот премиер Бенјамин Нетанјаху денеска изјави дека е посветен на воспоставување на палестинска држава и апелираше до палестинските власти да се вратат на преговорите.
– Останувам посветен на идејата дека единствен начин на кој можеме да постигнеме долготраен мир е концептот две држави за два народа – демилитаризирана палестинска држава која ја признава еврејската држава Израел, истакна Нетанјаху по средбата со шефот на германската дипломатија Франк-Валтер Штајнмајер.
Израелскиот премиер наведе дека со германскиот министер за надворешни работи разговарале за „заедничката цел остварување на напредок и мир со Палестинците“.
– Мислам дека единствен начин да го оствариме овој напредок се директните преговори. За жал, палестинската власт се откажа од овие преговори, потенцира Нетанјаху.
Во март за време на изборната кампања Нетанјаху предизвика загриженост кај меѓународната заедница, кога исклуичи формирање на палестинска држава, но подоцна ги повлече коментарите.