Украинската војска и проруските сепаратисти редовно практикуваат измачување и други видови на злоупотребувања на затвореници, но и на цивили, се наведува во извештајот, кој денеска го објави невладината организација Амнести Интернешнл.
Поранешни затвореници тврдат дека биле тепани до степен на кршење на коските, измачувани со електрична енергија, удирани со нож или не им било дозволено да спијат со денови, се наведува во извештајот.
Невладината организација за заштита на човековите права нагласува дека се сослушани 33 поранешни затвореници, од кои 17 биле заробени од сепаратистите, а 16 од украинските сили.
АИ наведува дека нивните сведочења се поткрепени со дополнителни докази, како што се „снимки на скршени коски, медицински извештаи, фотографии со траги од удари и други рани, лузни и скршени заби“.
Организацијата наведува дека оваа „шокантна“ пракса ја применуваат и двете страни.