Исклучително важно во овој момент е политичкиот дијалог да даде резултати што е можно побрзо, изјави вицепремиерот за европски прашања, Фатмир Бесими кој денеска не сакаше да одговори на прашањата дали се разгледува можноста ДУИ да ја напушти коалицијата со ВМРО-ДПМНЕ.
Сепак потпретседателот на Владата беше категоричен кога рече дека треба да се утврди одоговорноста на владините функционери за бројните обвинувања кои им се припишуваат. Бидејќи европинтегрирањето е загрозено, рече тој, само на овој начин Македонија нема да ја испушти можноста да стане дел од европското семејство.
– Во вакви турбулентни времиња во политичките состојби во Македонија, сметаме дека започнатиот политички дијалог е прв чекор кон решение со сите други последователни чекори што следат, од аспект на институционални решенија и од аспект на одговорност на сите носители на јавни функции, носители и креатори на политиките во Република Македонија. Со цел да ставиме јасно до знаење дека Македонија има јасен пат, а тоа е членство во Европска унија – изјави тој.
Бесими денеска се сретна со француската амбасадорка во Македонија, Лоренс Оер, на кафе пауза во МК-ЕУ Инфоцентарот. Оер, пак, изјави дека треба да им се даде можност на преговорите кои вчера започнаа во Стразбур и неколку пати посочи дека граѓаните имаат право да бидат информирани за содржината и за текот на овие преговори.
Оер потсети и на изјавата која минатата недела ја додаоа абасадорите на шест земји од ЕУ кои побараа независна истрага за наводите во прислушуваните разговори.
– Отпочнат е цел еден процес во Скопје, а синоќа и во Стразбур, и на тој процес треба да му ги дадеме сите можности. Она што беше кажано минатиот понеделник од страна на шестте амбасадори, а беше кажано на мошне искрен и отворен начин, се уште важи знаете, во целокупниот состав така како што беше кажано. Но од друга страна сметаме дека македонските граѓани заслужуваат да бидат целосно информирани за преговорите и навистина внимаваме граѓаните да бидат информирани во однос на дијалогот што се води. Нашата желба е што поблиску Македонија да се приближи до европското семејство и еден ден да биде целосно дел. Но сите знаеме кои се условите за да се постигне тоа, исто така знаеме дека на патот треба да се напредува. Нема скриени агенди и треба да се кажува јасно состојбата таква каква што е и да им се објаснува на граѓаните, затоа што заслужуваат да бидат постојано информирани. Истрагите се во тек и чекаме да слушнеме што ќе произлезе од нив. Овде сме да потсетиме дека нашата улога е да работиме за приближување на Македонија кон Европа – рече амбасадорката на Франција.
Како што рече Бесими, Македонија нема подоброа опција од Европската унија. Тој додаде дека во овие времиња Македонија треба да остане на својот курс кон ЕУ и да не го менува својот правец.
– Исклучително важно во овој момент е политичкиот дијалог да даде резултати што е можно побрзо, да дојде до решение и на тој начин да дадеме можност Македонија да не ја испушти можност на евроатланската интеграција. Македонија се повеќе станува тема на состаноците и институциите во Европска унија. Затоа е важно Македонија да прати искрени сигнали дека сме заинтересирани за членство во ЕУ и тоа не само од формален аспект, туку и од суштински. Тоа е интерес на граѓаните на Македонија. Итересот на граѓаните треба да биде водечка тема на овие состаноци на политичките лидери. Европска унија во Република Македонија може да и се случи само ако ние останеме цврсто определени за нашето зачленување во ЕУ. Ова што се случува го загрозува тоа интегрирање. Се што се прави во овој период, вклучувајќи го и политичкиот дијалог, треба да биде во функција на тоа Македонија да не излезе од овој пат што гарантира нејзина иднина во ЕУ – додаде вицепремиерот.
Маја Васева