На граѓанскиот пленум во кампот пред Владата, денеска, освен неколку интелектуалци и активисти, говореа и самите граѓаните кои побараа преку микрофонот премиерот, Никола Груевски да се повлече од функцијата и да ја напушти власта. Тие го споредија Груевски со Чаушеску, Садам Хусеин, Милошевиќ и Хитлер. Присутните граѓани на овие споредби извикаа „Како нив и ќе заврши“.
Самохрана мајка со 10-годишно детенце му порача на премиерот да ја прекрсти државата во „Survivor“ затоа што граѓаните овде научиле да преживуваат благодарение на него.
-Никола, дали спиеш овие денови? Добредојде во нашиот свет на несоница. Си купи мерцедес, Никола, а јас нема на детето точак да му купам – рече таа.
-Господине Груевски, како поранешен боксер во нула категорија, се наоѓате во нокдаун. Фрлете ги вашите ракавици и дозволете борбата да ја продолжат мудрите и чесни борци – рече еден велешанец.
– Малку ќе ми биде еден саат за да кажам колку сум разочаран од оваа држава. Ја гледам „Сител“, гледајте ја и вие затоа што уште малку ќе ја нема, за да ви остане во спомен. Се чудам колку и е убаво на државата кога гледам „Сител“ – порача Васил Јовчевски.
Веќе неколку години ме прашуваат зашто се вратив, немам одговор.Не знам зашто се вратив во Македонија, но овие денови научив дека нешто ме вратило тука, а не јас сам себе. Јас не сум политички одреден, секој ден по 20 километри одиме од 5 мај, рече Александар Младеновски.
-Никогаш повеќе да не се повтори со мои другари од ВМРО-ДПМНЕ да не можам да зборувам, да не се повтори да не делат на СДСМ и ВМРО-ДПМНЕ, ни на Албанци, ни на муслимани, вакви и такви. Сите да бидат слободни засекогаш, рече Младеновски.