Германската компанија Порше ја комплетираше гамата тркачки автомобили базирани на новиот 911 со претставувањето на 911 ГТ3 Р, кој ќе се најде меѓу 911 ГТ3 куп и 911 РСР моделите.
Новиот ГТ3 Р потекнува од 911 ГТ3 РС патниот модел, кој е претставен пред неколку месеци. Моделот е изработен за ГТ3 натпревари, а главен фокус на инженерите е лесниот дизајн, ефикасноста на аеродинамиката, подобрена потрошувачка, подобрено управување, безбедност и намалена цена за сервис и резервни делови.
Силата доаѓа од 4,0 литарски мотор, што е речиси идентичен со тој од ГТ3 РС патниот модел, а ќе обезбедува околу 500 коњски сили. Моќта преку шестстепен секвенционален менувач се пренесува на задната оска.
Главниот дел на телото е изработен од алуминиум, метал и композитни материјали, додека останатите делови се од пластика зајакната со јаглеродни влакна. Сите прозорци се од поликарбонат, со што вкупната тежина изнесува 1.219 килограми.
Особено внимание е посветено на безбедноста на возилото. Резервоарот сега има безбедносен вентил за прекин на дотокот на гориво, вратата и страничните прозорци се лесно отстранливи, а отворот на покривот за случај на опасност е поголем од претходниот модел.
Новиот ГТ3 Р натпреварувачкиот живот ќе го почне во сезоната 2016 година, а првите тимови своите примероци ќе ги добијат овој декември. Цената без данок изнесува 429.000 евра.