Либанската шиитска група Хезболах вчера соопшти дека убила над 20 борци на сириската ќелија на Ал Каеда, „Џебхат ан Нусра“ (Фронтот на победата) и разурнала неколку скривници и тренинг кампови, што џихадистите ги користеле за напади во Либан преку границата со Сирија, пренесоа британските медиуми.
Телевизијата на Хезболах, „Манар“, ја информира јавноста дека сириската армија и отпорот, како што се нарекува Хезболах, постигнале „значаен напредок“ во својот последен напад врз сириските бунтовници, кои се борат против режимот на претседателот Башар Асад.
Лидерот на Хезболах, Хасан Насрала, во вторникот вети дека неговите борци и нивните сириски сојузници ќе ги исчистат регионот од бунтовниците, кои тие ги користат за доставување на оружје.
Телевизијата, исто така, соопшти дека Хезболах, групата која е поддржана од Иран, и сириската армија зазеле голема територија во Асал ал Вард, стратегиски реон на сириската страна на планината Каламун, веднаш до границата со Либан, каде Хезболах има силно влијание и присуство.
Три големи тренинг кампови на „Џебхат ан Нусра“ биле уништени, а големи количества мини и експлозивни направи биле деактивирани, додаде телевизијата „Манар“.