Скопје 2014-та е одличен проект, со значајна суштина, поврзана со нашиот толку многу негиран идентитет и историја, со разубавување на главниот град, со негово правење поатрактивен за туристите, со активирање на градежниот сектор во време на најголемата светска криза, со обезбедување сопствени простории на државните институции, наместо плаќање кирија итн., но можеби беше наша грешка што сакавме да направиме се што се пропуштило во 50 години.
Ова го истакна претседателот на ВМРО-ДПМНЕ и актуелен премиер Никола Груевски во обраќањето на 15.Конгрес на партијата, кој се одржува во Куманово. Посочи дека има и различни коментари околу естетиката и вкусот, но, појасни, секаде во сите големи градови било исто кога се правеле вакви крупни проекти и зафати во центрите на главните градови.
– Некои биле против и жестоко протестирале други биле за, и од естетски агол и од секој друг агол. Овој проект за среќа има многу повеќе поддржувачи отколку противници, како во Скопје, така и на ниво на Македонија. Но, сепак се чини предолго се развлече и надгради, а имајки го предвид дека на некои луѓе им пречи. Сега е во завршна фаза, рече Груевски.
Во делот на спомен обележјата, посочи, ни преостана уште изградбата на спомен обележјето на светски познатата хуманистка скопјанката Мајка Тереза, чие проектирање е при крај и наскоро ќе почне градбата и тоа е последниот споменик, кој е предвиден во овој проект за кој ќе инвестираме буџетски средства.
– Запознат сум од медиумите дека едно здружение, подготвува со сопствени средства и споменик на прогонетите Македонци од граѓанската војна во Грција. Завршно со ова, мислам дека за овој период е направено повеќе од доволно во поглед на спомен обележјата. Тие споменици и настаните и ликовите на тие споменици, ќе го држат рбетот на македонската нациија низ иднината, како што преку нивното делување низ историјата ја држеле кичмата исправена на македонската нација токму тие ликови кога биле живи и делувале, и станале херои и големи личности со кои најголем дел од нас се идентификуваат, истакна Груевски.
Во таков контекст, но поширок од самиот овој проект, рече Груевски, имаше и многу забелешки дека имаме преголем фокус на историјата.
– Мое мислење е дека ни требаше еден таков период заради потиснувањата и искривувањата претходно, и сега тој дел е надокнаден. Потребен е и поголем фокус на здравјето на луѓето и на животната средина, додаде Груевски.