Градоначалникот на општина Центар, Андреј Жерновски, на својот ФБ профил одговори на нападите за резултатот од вчерашниот референдум за ГТЦ.
Еве што напиша Жерновски:
Ветив дека нема да го вметнам ГТЦ во политички води и ќе останам доследен на тој принцип до крај.
Спротивно на тоа, ја гледам кај многумина силната потреба да се исполитизира овој референдум.
Ова беше изјаснување на граѓаните по одредено прашање, што е впрочем и суштината не еден референдум. Познавам опозиционери кои не гласаа, како и поддржувачи на владеачката гарнитура кои учествуваа на референдумот. Точно е дека тие не се во голем број, но ги има. И утре ќе има повеќе.
Сакаме да ги вклучиме неопределените гласачи и невладините организации, но кога тие ќе одлучат да го сторат тоа, веднаш ги оддалечуваме и дополнително ги разочаруваме со тоа што политички им ги инструментализираме нивните гласови.
Самите сме виновни за тоа, зарем не?
Со ставовите на новинарите кои ме напаѓаат не се согласувам, но не им се лутам за тоа, бидејќи со тоа би бил ист како оние против кои се борам. Во демократијата мора да ги почитуваме различните ставови, без разлика колку тие (не) ни се допаѓаат.
Парадоксален е фактот дека владеачка партија, секако преку нејзините медиуми, се обидува од петни жили да го исмева резултатот која, патем, она никогаш не успеала да го оствари во историјата на општина Центар.
Вчерашниот резултат покажа дека ГТЦ има повисок рејтинг од сите нас во политиката, и, меѓу нас, тоа многу ме радува.
Токму затоа, тој мора да ја задржи својата автентичност.
Во име на тоа, битката продолжува!