„Жителите на Дебар маало не дозволуваат да се упропасти душата на Скопје – Градски трговски центар. На средбата со градоначалникот на општина Центар Андреј Жерновски, неговите соработници и директорот на ЈП ПОЦ Саша Богдановиќ јасно порачаа дека ќе излезат на 26 април за да го дадат својот глас за зачувување на автентичниот изглед на ГТЦ“, соопштуваат од Општина Центар.
Жерновски ги замоли сите жители на Центар да го искористат своето право и од 07:00 – 19:00 часот, в недела на 26- ти, на истите избирачки места, каде што гласаат на парламентарни, претседателски и локални избори да дојдат и да го кажат својот став за ГТЦ.
„Ова е историска работа бидејки во Центар за прв пат се одржува референдум. По ова во општина Центар ќе имаме референдуми за сите битни прашања кои ги засегаат граѓаните. Референдумот е за да се исправат погрешните политики на властите“, рече Жерновски.
„На средбата граѓаните беа информирани дека целосно ќе се реконструира вториот дел на улицата Орце Николов од Идадија до бензинската пумпа, Аминта Трети од паркот до Партизанска, Димитрија Туцовиќ, а конечно Дебар маало ќе добие и свој парк.
Дебар маало 1 и Дебар маало 2 се првите ДУП-ви кои ќе бидат разгледувани.
Од мај месец продолжува акцијата Цел Центар на точак.
Од септември родителите на децата во училиштата во Центар нема да плаќаат за обезбедување, за еднодневна екскурција, а во градинките за физичко воспитување и англиски јазик. Овој трошок ќе го плаќа општина Центар.
Договорена е посебна средба за решавање на проблемите со паркингот, а директорот Богдановиќ информираше дека гостинската карта ќе важи за 150 часа“, велат од Општина Центар.