Тоа што се зборува во разговорот за кој од СДСМ посочија дека е помеѓу Никола Груевски и Миле Јанакиески, така истото се случуваше во 2013 година пред општина Центар. Од видеото на А1он се гледа дека се собраа околу 2000 луѓе, таканаречени верници, се обидоа да влезат внатре, Жерновски беше повикуван да се појави пред таканаречените “верници“ за да може да јаде “пет-шест шамари откако не успеаа тие да влезат внатре, а за седницата како што беше кажано и во објавениот разговор-беше побарано да се одложи, но предлогот на советниците на ВМРО-ДПМНЕ не беше прифатен.
Пцуење, навреди, туркање, плукање, тепање, закани за ликвидации, кршење. Така беше злоупотребена религијата за партиски цели во 2013 година, за да се спречи донесувањето на ДУП за Центар.
За бранителите на цркватата кои ги бараа своите права во општина Центар беше уште тогаш кажано дека се од општински организации на ВМРО-ДПМНЕ, повеќето од Драчево и Бутел, а координирани цело време од советник на ВМРО-ДПМНЕ во Центар. Тие добиваа информации и инструкции кога да напаѓаат, а кога да се повлечат. Добиваа инструкции и да не бидат снимани и да не даваат изјави за да не се открие она што на сите им беше уште тогаш јасно.
МВР тогаш, како и што е во објавениот разговор кажано, соопшти дека не може да ги спречи граѓаните да го искажат своето незадоволство, исто како што било и порано со други граѓани кои се бунтувале против политиката на екс составот на Советот на Центар.
МВР веќе две години не покренува постaпка за учесниците во кршењето на имотот на Центар, иако се познати за целата јавност.
