Поради штрајк на контролорите на летање, во Франција денеска се откажани 40 отсто од вкупниот број летови, објавија француски медиуми.
Синдикатот на вработените во цивилното воздухопловство организира дводневен штрајк поради незадоволство од условите за работа и за заминување во пензија.
Најголемиот француски авиопревозник „Ер Франс“ соопшти дека штрајкот нема да влијае врз прекуокеанските летови и гарантира извршување на 60 отсто од летовите во Европа и само една третина во државата.
Штрајкувачите сметаат дека е спорно зголемувањето на возраста за заминување во пензија на контролорите на летање од 67 на 69 години. Тие планираат нови штрајкови за периодот меѓу 16 и 18 април, како и од 29 април до 2 мај.